Sielkunde speel ‘n groot rol in ons tye.
Dit het ook op Spiritualiteit sy spoor gelaat.
Met die sielkundige fokus op die mens se
welsyn, word veel aandag bestee aan self-help middels en literatuur. Dit het
ook op die terrein van Spiritualiteit oorgespoel. Lesniak noem in haar artikel
oor kontemporêre spiritualiteit drie sulke sielkundig-georienteerde
self-help boeke wat ‘n geestelike karakter het en wat veel aandag getrek het.
Hulle is Thomas Moore se Care of the
soul: a guide for cultivating depth and sacredness in everyday life. Dan is daar Scott Peck se The road less traveled: a new psychology of love, traditional values
and spiritual growth, asook Gerald May se Addiction and Grace: Love and spirituality in the healing of
addictions.
Die titels van hierdie werke is al
veelseggend en wys hoedat geestelike groei verbind word met die versorging van
die mens se innerlike. Hulle beklemtoon dat die mens verantwoordelikheid vir sy
of haar eie lewe moet neem. Geluk vind
‘n mens alleen maar as jy daarna soek, word daar geredeneer.
In hierdie gewilde boeke word baie
verskillende benaderings saamgegooi in een groot hutspot van self-werksaamheid
en self-vervulling. Daar word aandag gegee aan drome – met ‘n skeutjie
Jungiaanse insigte daarby. Mense word aangemoedig om kreatief te wees deur te
skryf, veral ook oor hul eie lewe en op ‘n daaglikse basis. ‘n Groot klomp
tema’s word aangeraak, soos uitreik na ander, nie-gewelddadigheid, verslawing,
liefde, pyn, gebed, genesing, vergifnis, self-vertroue, omgewingsbewussyn, ‘n
gesonde emosionele lewe, sorg vir die liggaam, die enneagram,
persoonlikheidstipe’s en vele ander.
Al hierdie dinge dien die individu se
welsyn. Wat uiteindelik tel is om gelukkig te wees, om in aanraking met jou
innerlike lewe te wees, om ‘n gebalanseerde lewe te voer, om genesing te soek
en om na volwassenheid te streef.
Hierdie fokus op sielkundige perspektiewe
speel inderdaad in geestelike groei ‘n groot rol. Die mens wat in vervullende
verhoudinge leef, is iemand wat volwasse en sterk is. Maar Spiritualiteit gaan
om veel meer as net innerlike vrede en balans. Hoewel ‘n mens ‘n vervullende
bestaan moet kan voer, is die lewe veel groter as net ‘n mens se eie, innerlike
lewe.
Daarom is dit nodig om steeds weer te
beklemtoon dat ‘n mens deel is van groter strukture – van die familie, die
gemeenskap en die samelewing. Spiritualiteit het ook te doen met hierdie groter
sfere.
Spiritualiteit kan nie verskraal word
tot ‘n private belewenis nie.
