Liefde en verantwoordelikheid.

Buber skryf in sy bekende werk, “I and Thou,” dat liefde as ‘n "gevoel" misverstaan kan word.

Dit is wel waar dat ‘n mens liefde kan ervaar, maar liefde is baie meer as gevoelens.

Liefde is ‘n omvattende, kosmiese mag wat baie groter as ervaringe is.

As voorbeeld verwys hy na Jesus se gevoelens van ontferming vir iemand soos die duiwelbesetene wat verskil van Jesus se liefde wat hy vir sy geliefde dissipels gehad het. Al verskil Jesus se gevoelens, is Jesus in beide gevalle lief vir die twee en is die liefde vir hulle dieselfde.

‘n Mens, skryf Buber, “het gevoelens.” Maar liefde gebeur met jou – jy “besit” dit nie of “het” dit nie. Wanneer ‘n mens lief het, is jy nie die een wat beheer en kontroleer nie. Jy is iemand wat omgee, wat uireik, wat versorg, help. genees, optel.

Die liefde gaan nie oor wat jy voel, oor emosies en kragte in jou nie, maar om 'n ander Mens, 'n ander Persoon.

Liefde bring eerder verantwoordelik vir die ander persoon met wie jy in ‘n verhouding staan. Jou liefde vir die ander een, vir die “Jy” beteken daardie persoon is jou gelyke.

Laat mens dink. Op die manier gesien, staan 'n mens nooit self in die sentrum van jou liefdesverhouding nie, maar is die Ander Een, die Geliefde, die een teenoor wie 'n mens verantwoordelik is.

Ek verstaan Levinas so bietjie beter.