In ons vaal bestaan, is daar vir ons meestel min “verrassings.” Die delwer op die myn versinnebeeld ons daaglikse ervaring: een emmer vol gruis na die ander word gedelf, gewas en uitgegooi op die sorteerband. Daar is dikwels dae en dae wat omgaan voordat die delwer die blink klippie raaksien en opgewonde, dankbaar beloon word vir die wag, die konsentrasie, die volharding.
Vaalheid, teleurstellings, roetine, harde werk, maar meer nog, selfs probleme is ons deel en lot. Veral van ons geestelike reis.
‘n Mens kan hierdie saaiheid verduur en probeer oorleef. Maar jy kan ook daardeur sif, op soek na die blink klippie te midde van al die gruis. Dan is 'n mens ingestel op hoe jy gevorm word, hoe jy groei deur jou ervaringe, selfs al is hul op die oog af sinloos en vaal.
Dus: die uitdaging is om te soek na dit wat waardevol is, maar begrawe is onder die sleur van elke dag.
Dit gebeur nie baie nie. Ons kyk vas in al die waardelose klippe en mis die goeie, blink oomblik wat alles tog uiteindelik die moeite werd maak. Dit is 'n proses van instelling, van bewuswording, van fokus op wat saak maak.
Wie soek, sal vind... selfs in die slegste oomblikke van ons bestaan, kan ons, as ons geestelik ingestel is, die waardevolle oomblikke ontdek.
No comments:
Post a Comment
Note: Only a member of this blog may post a comment.