By
die kongres vra iemand uit die gehoor watter rol 'n leser speel in die uitleg
van die Bybel. Hy verwys spesifiek na die rol wat 'n mens se
voorveronderstellinge speel. As jy protestants is, gaan jy die Bybel uit 'n
protestantse hoek lees. Wie jy is, gaan bepaal watter antwoorde jy in jou
Bybel-uitleg vind.
John
Meier lewer repliek. Hy verwys na die beroemde debat tussen Jeremias en
Bultmann. Hierdie twee Nuwe-Testamentici het koppe geskuur oor die vraag of 'n
mens sonder enige voorveronderstellinge eksegese van die Bybel kan doen.
Maar
as dit waar is dat 'n mens nie die Bybel sonder voorveronderstelling kan lees
nie, beteken dit nog nie dat 'n mens se uitleg van die Bybel daardeur
gedetermineer word nie. Dikwels, byvoorbeeld, ondersoek 'n mens die Bybel met
'n bepaalde gedagte wat jy graag wil "bewys." Dit is ook 'n
voorveronderstelling waarmee 'n mens na die teks gaan. Maar dan lees jy die
teks en ontdek dat jou mooi teorie nie deur die teks gesteun word nie. Hy het,
vertel Meier, dikwels sulke mooi teorieë gehad wat hy moes laat vaar het.
Jou
voorveronderstellinge is die konteks waarbinne jy na die Bybel gaan. So het
Bultmann dit ook gesê. Maar die teks bepaal uiteindelik wat met die uitleg gaan
gebeur. Hiervoor het 'n mens 'n bepaalde openheid nodig: jy moet dus eerlik met
jou voorveronderstelling omgaan. 'n Belangrike eiendskap van enige
wetenskaplike ondersoek is dat 'n mens self-krities moet wees. Ook teenoor jou
eie voorveronderstellinge. Jy is dus nie die slagoffer van jou
voorveronderstellinge nie.
Dit
alles veronderstel dat 'n mens na die teks, die Bybel gaan, met 'n fundamentele
voorveronderstelling dat die teks 'n leidende rol speel in jou uitleg. Hoe jy
nou ook al reeds die teks verstaan, bly jy altyd oop vir die moontlikheid dat
jy die teks nuut kan interpreteer en dat ou gevestigde waarhede daardeur in die
slag kan bly. En dit is nie net 'n gemeenskap wat uit jou eie, klein groep bestaan nie. Dikwels word jy getransformeer deur wat die eerste geloofsgemeenskap oor Jesus gedink het en kom jy daartoe om heel nuwe insigte te aanvaar as die insigte wat jy voorheen vasgehou het.
Op
die manier, besef ek terwyl ek na die debat luister, is 'n mens nie net eerlik
en self-krities terwyl jy die Bybel lees nie - ook teenoor die houvas wat jou
eie, vooringenome idee's op jou kan hê nie. Nederigheid word 'n deug: die wete
dat jy deel is van 'n groter Gemeenskap wat jou denke en lewe vorm en stuur -
meer as wat jy somtyds dink of verwag.
Dus
: 'n mens lees doelbewus die Bybel met die houding dat jy verander kan word in
wat jy weet en wie jy is.
