Ons besoek vanoggend
Noyon.
Die katedraal toring
bo die stadjie uit. Dit dateer uit 1150, toe begin is om dit te bou. En eers
140 jaar later was die massiewe struktuur klaar.
Toe Calvyn in 1509
gebore was, was die katedraal dus al 219 jaar oud.
Ek verwonder my by
die gedagte dat ek die gebou kan besoek waar Calvyn soveel kere kerk toe gegaan
het.
Die kerk van Noyon was een van
die mees invloedryke instellings in Frankryk - selfs belangriker as die Notre
Dame in Parys. En Calvyn se pa was
blykbaar 'n bekende figuur in die kerk. Die gebou is 'n voorbeeld van die Gotiese
styl. Die struktuur, nou grootliks gestroop van sy versierings, het met ons besoek,
wonderbare ligroos kleure bo die wydse pilare wat sierlik boë vorm.
Ons besoek die kerk
nadat ons by die Calvyn-museum inloer. Die gebou self is klein en die
uitstalling vaal. Die huidige struktuur is vier eeue na Calvyn se geboorte opgerig.
Al wat seker is, is dat Calvyn op die plek gebore is.
Vir my word die oggend
boeiend: ons loop die paadjie van sy geboortehuis na sy kerk, net om die draai.
Ek besef, terwyl ons dit doen, hoe sy lewe deur die massiewe gebou beïnvloed
moes gewees het en wat dit aan hom gedoen het om van die kerk afskeid te neem.
Die vonds van die
dag kry ek egter in die Engelse inligtingstuk wat die museum in 'n lêer vir Engelse
besoekers aanhou. Calvyn kom uit 'n moeilike familie. Sy pa het as prokureur na die kerk se finansies omgesien. Hy het hom vererg omdat hy van oneerlikheid beskuldig is en het net daar sy opponent bygekom. Hy is uit die kerk geban. Later sou Calvyn se broer, Charles, ook
'n priester geklap het. Ook hy is uit die kerk geban.
Moeilike manne, besef ek. En kry nuwe insig in my Hugenote voorouers wat Kaap toe getrek het....
Hier is Calvyn se geboorteplek:
