Hoe belangrik is al die dogma's en
geloofswaarhede waaraan mense vashou?
Groot doop of kinderdoop. Die
opstanding. Evolusie. Aborsie. Geboortebeperking. Spreek in tale. Onderhouding van die sabbat. Vrouens in die
amp. Die maagdelike geboorte. Proefbuis-bevrugting.
Ons glo ons het die waarheid oor die sake in pag. En ons klou daaraan.
Al hierdie "waarhede", sê
mense, is vir hulle geloof belangrik.
En tog: Sommige glo en daarom is die opstanding vir
hulle letterlik waar. Hulle glo, sê ander weer, maar vir hulle is die
opstanding van groot geestelike eerder as letterlike waarde.
Een geloofsgroep vra van sy
geestelikes dat hulle ongetroud moet wees en selibaat moet leef. In die
volgende kerk beroep 'n gemeente nie maklik 'n ongetroude predikant nie. Hulle kan vir hierdie praktiese sake 'n klomp waarhede aanbied.
Maar albei groepe maak daarop aanspraak dat hulle "gelowig" optree.
In sommige kerke word wetties aan
die oorgelewerde tradisies vasgehou. Ander kerke, weer, besef dat die kerk met
die tye moet aanbeweeg en dat tradisies nie onaantasbaar is nie. Hulle kan in
ander situasies die tradisies opgee en nuwe besluite neem.
Op die manier kan 'n mens aan allerhande
geloofswaarhede vashou én aanpas. Tradisies
word dus by sommige versigtig geleer en bewaar. By ander loop dit nie altyd so star nie.
Maar ook in die mees
konserwatiewe groep, word tradisies ook verander en selfs laat gaan.
Dan, en dit is die belangrike, is
daar nog naas en veral onderliggend aan die tradisies die geloof. In die
tradisies kom geloof na vore. Geloof bepaal of mense aan tradisies vashou of
daarvan afskeid neem.
Op 'n diepe vlak broei en leef
geloof dus. In geloof is energie, lewensdrif, vertroue. Geloof vertel hoe die
mens aangeraak is, omvorm word en steeds weer op die geloofsreis dieper in die
verhouding met God en ander dieper geanker word.
Hierdie geloof is dus dinamies,
oop, eksperimenterend. 'n Mens weet nooit waarheen geloof jou neem nie. Dit is
geloof wat jou lewe kan ondermyn, wat 'n mens in 'n rigting neem wat jy nie
voorsien het nie.
Geloof kan nie netjies in sekere
waarhede opgesluit word nie. Dogma's is 'n tydelike uiting van geloof. Maar dit is geloof wat dikwels nuwe weë oopbeur.
Daar is op die mees basiese vlak 'n
lewenservaring wat mense in beslag neem en altyd vashou. Uit hierdie
lewenservaring kom pogings om daaroor te praat, om dit in verstaan na vore te
bring.
Dit is 'n bevrydende insig: geloof
en geloofswaarhede is twee dinge.
