Die Heilige Gees sal vir julle intree...

“Die Heilige Gees sal vir julle intree....”

Hierdie uitspraak in die Bybel het my nog altyd geboei. Iewers is selfs ons gebed van God ingegee. Gebed is ‘n stuk genade wat ek ontvang. Wat ek bid, is eintlik wat God vir my bid.

Merkwaardig.

Hoe weet ek dat die Gees besig is om in my te bid – al voel dit vir my nie so nie?

1. Wanneer ‘n mens nie kan opgee op gebed nie, is dit ‘n teken dat die gebed nie bloot jou eie inspanning is nie. Al voel alles nog donker om jou. Is daar iets wat jou laat aanhou. Iemand hou jou gebed lewendig.... Gebed wat van God kom verstom nooit nie.

2. As alle ander aardse dinge vir my vaal lyk terwyl ek bid. Eintlik, voel ek, terwyl ek bid, is daar nie regtig iets anders wat ek graag sou wou doen nie. Gebed wat van God af kom is so spesiaal dat dit aardse belange en sorge op die agtergrond laat verdwyn. Daarom is my hart nie meer aan die gewone, alledaagse dinge uitverkoop nie. Ek voel dat hier waar ek nou is, selfs in ‘n stamelende, weifelende gebed is dit baie beter as om op enige ander plek te wees. Gebed wat van God kom bevry jou van aardsheid.

3. As ek sterk bly voel iets is in my aan die werk. Ek het die gevoel dat in al my twyfel, in my soeke, iets met my aan die gebeur is waarvan ek nie kan wegkom nie en wat my bly aantrek. Ek het ‘n gevoel dat vreugde naby is, dat dit aan die kom is, selfs al is alles om my in chaos. As ek gewillig bly om te wag, om deur te byt, om te volhard, is dit ‘n teken dat God aan die werk is. Gebed wat van God kom voel God is besig om te antwoord, selfs al lyk dit nie so nie of al verstaan ek nie wat aangaan nie. Gebed van God vertel my God is besig om my aan te raak. Iets diep in my hart sê vir my: God is hier, hier wil my hart ook wees.


Om so te kan bid, sonder al ons lysies met versoeke, om te bid net om met God te wees!


Dit vra 'n heel nuwe verstaan van gebed.