Psalm 63: God se ooweldigende teenwoordigheid in my dor bestaan - oor kontemplasie

Psalm 63 is ‘n pragtige, hoogs mistieke Psalm, gelaai met intensiteit.

Dit word in ‘n woestyn, ‘n plek van verlatenheid, gesing (vers 1). Die Psalm begin ook met diepe emosies, intense ervaringe: Die Psalmis “soek” na God. Oratief, biddende, stort hy sy soeke voor God uit: “Ek soek U, my God.” En dan volg nog meer sterk woorde waarmee hy sy verlange uitdruk: hy dors, hy smag na God.

In vers 7 gee hy ons ‘n bietjie meer agtergrond oor homself: hy is op sy bed, dink na oor God: “As ek aan U dink op my bed” (kyk die oratiwiteit – hy is in ‘n gesprek met God). Hy mediteer oor God, maar praat weer eens direk met God: “as ek... oor U peins in die nag.” Hierdie Psalmis is gevul met verlange waar hy meditatief oor en met God nadink en mediteer.

En dan kom die kontemplasie, die aanskouing: “dan weet ek,...” (vers 7). En die merkwaardige vers 4 (Ou Vertaling): “So het ek U in die heiligdom aanskou, om u sterkte en heerlikheid te sien.” En daar, meditatief, oratief, oordenkend, biddend, in die nag op sy bed, die verrukking in God: “Want u goedertierenheid is beter as die lewe; my lippe moet U prys.”

Om so deur God oorweldig te word, is om jou lewe as nietig te ervaar - dit is "beter as die lewe". Wat regtig saak maak, is om by God te wees. ‘n Mens roem met jubelende mond vir God (vers 6). In die lig hiervan is jou aardse lewe vaal en word jou woestyn-bestaan omgetower in 'n paradys-ervaring.

Die ou vertaling is aangrypend: “In die skaduwees van u vleuels sal ek jubel” (vers 8).

Is dit dan moeilik om te verstaan? Hier word dit so duidelik uitgebid: in ‘n mens se verlange na God, in die donker nag van die siel, in ‘n dor en uitgedroogde land (vers 2; Ou vertaling), is God in heerlikheid aanwesig! Wanneer jy alles oordenk en met God praat, sal jy God in heerlikheid aanskou en 'n loflied sal in jou losbreek.