Om jou in te leef. Oor bewuswording

http://www.youtube.com/watch?v=UcWsTwvtyOI

Daar is ‘n advertensie wat na bewering deur die SAUK verbied is (wat nie eintlik waar is nie). Dit is oor ‘n witman wat in ‘n lokasie-setting vroeg opstaan om werk toe te gaan. Oral waar hy kom, word hy “swart” behandel – soos byvoorbeeld as hy as ‘n skelm aangesien word. Hy is arm aangetrek en oral rondom is witmense wat duidelik ook in dieselfde situasie as hy is. Dit is nogal ironies en eintlik skokkend. Dit is so teen alles wat ons normaalweg aan gewoond is en ervaar.

Dit is nogal ‘n merkwaardige advertensie. Volgens sommige mens wys dit ons hoe ons ander mense stereotipeer as hulle deel is van ‘n ander groep as ons s’n.

Maar vir my was die advertensie eintlik pynlik: deur die visuele uitbeelding het ek my onstuitbaar ingespeel gekry in die rol van ‘n nie-bevoorregte Suid-Afrikaner. Ek was ongemaklik en het besef hoe maklik ek verby die omstandighede van mense rondom my leef en hoe hard dit my maak.

Dit is merkwaardig om die hatige, liederlike rassistiese kommentaar op You Tube te lees waarin mense op die video reageer. Mense is duidelik ontsteld oor wat hulle sien. Iewers raak die video ‘n rou senuwees en maak dit mense woedend.

As ons so ‘n video maar kan maak waarin ons gedwing word om ons in te leef in die omstandighede van baie ander randfigure by wie ons elke dag amper roekeloos ongevoelig verbylees. Wat van die manier waarop ouer mense as gedementeerd, swak, onbeholpe uitgebeeld word? Wat van die verkragte vrou wat deur een verskriklike episode nie meer die lewe in die oë kan kyk nie? Wat van ouers met ‘n blinde kind? Wat van mense wat liggaamlik gestremd moet leef? Wat weet ons van al hierdie mense se werklike, daagliks lewens?

Ek weet dat in die opleiding van medici moet sommige studente ‘n dag lank in ‘n rolstoel rondbeweeg dat hulle hul kan inleef in die situasie van mense wat hulle moet behandel. Daar is die beroemde fliek van ‘n dokter wat self ernstig siek word voordat hy hom in die skoene van sy pasiënte kan indink.

Bewuswording is ‘n deurslaggewende deel van spiritualiteit: jy moet jou kan inleef, deel word, in die skoene indink van.... Om die menslikheid van ander te ontdek en te eerbiedig, moet ‘n mens met hulle kan meelef – tot in die diepste grein van hul daaglikse ervaringe. Jy moet een met hulle kan word. Eers dan kan jy vir hulle werklik die mede-mens word wat hul nodig het.

Kyk maar net hierdie video en besluit self:

http://www.youtube.com/watch?v=UcWsTwvtyOI