‘n Mens kan dit geniet om te verlang!

Dit is nou 'n titel! Kan 'n mens dit geniet om te verlang?

Ons sien verlange dikwels as ‘n negatiewe ervaring, asof ons iets “mis”, “eensaam” is, “sielsongelukkig” voel.

Verlange kan inderdaad hierdie negatiewe dinge wees.

Maar verlange kan ook beteken dat ek aan die soek is. Ek vra na die dieper dinge omdat die dinge om my te oppervlakkig is en my begeerte nie kan vul nie.

Verlange in hierdie sin is baie sterk en positief: die laat hom nie onderkry deur die donkerte om my, die oppervlakkighede wat ek oral raaksien nie.

Verlange kan selfs vrede bring, omdat ek uiteindelik my rug kan draai op dit wat my so frustreer. Al moet ek in die duisternis ingaan, is dit nog beter as dit wat my nou omring. Soms kan selfs die pyn wat ek ervaar, vir my vreugde bring. Want ek weet die pyn beteken die lossny van ‘n slegte band met dit wat verkeerd is.

As ek hierdie gevoel kry, dat in my verlange ek besig is om tastende, voelende, soekende weg te breek van dit wat my bind en uitbreek na God, is dit eintlik God wat aan die werk is in my. Dit is asof God vir my sê: hier is ek, kom, ontmoet my.

Dit gebeur wanneer ons wakker word en voel – ek moet ‘n slag weer kerk toe gaan, of ek moet ‘n keer weer my Bybel lees. Dit is die Gees wat in my aan die praat is, wat vir my wil weglei in die woestyn in, die plek van verlatenheid waar ek oop sal wees vir God.

Baie tye het ek die Bybel een kant geskuif omdat ek nie meer veel sin aan Bybellees gehad het nie. Dit was sinloos. Maar as daar in my ‘n behoefte opkom, is dit ‘n teken van God wat my aanraak. Wat ander kere so sinloos voel, kry dan ewe skielik vir my betekenis. Dit is die eerste stap na ‘n ontmoeting en aanskouing met God.

Ek moet ingestel wees op hierdie behoefte. Ek moet oop wees om te besef dat wat hier met my gebeur, nie verlore mag gaan nie. Ek moet my koffer pak, my gereed maak, my instel en oorgee: hier kan ‘n groot avontuur begin!

As 'n mens verlang, is dit hoog tyd om te vra: wat gebeur in hierdie verlange met my? Hoekom sug my hart? Of: wie is dit wat my hart laat sug?

Die antwoord kan 'n verrasing wees. En 'n vreugde bring.