Die onderskeiding van God se wil

Hoe ontdek ‘n mens God se wil vir jou lewe? Hoe onderskei ‘n mens wat God van jou wil hê?

“Gesonde verstand” is vir die meeste van ons dit wat regtig die deurslag gee: jy vang nie dom dinge aan nie, want jy moet eet en ‘n plek hê om te bly. Daarom werk jy vir ‘n goeie salaris. Daarvoor het jy geleerdheid nodig en moet jy sorg dat jy jou matriek kry en jou kwalifikasies.

Jy neem nugter besluite.

"God help hulle wat hulself help", redeneer ons. As jy deurdagte besluite neem, is dit wat God vir jou wil - so redeneer ons.

En in jou hart koester jy jou lewe lank ideale wat nooit vervul word nie.

En dan word jy op 'n dag nogal met 'n probleem gekonfronteer. Somtyds kom God na ‘n mens op ‘n baie normale manier om vir jou iets te sê wat jou gesonde verstand-besluite bevraagteken. Jy teken darem mooi, skryf iemand wat gesien het hoe maak jy iewers vinnig ‘n tekening. Jou hele lewe lank wou jy ‘n kunstenaar wees, maar jou gesonde verstand laat jou verstrik raak in saai dinge wat jou lewe belas en jou weghou van jou drome. En dan sê God vir jou skielik op 'n dag op hierdie manier opnuut weer: jy teken mooi. Jy kan mense se lewens verryk met jou tekeninge.

Is dit dan God se wil vir my lewe? Om 'n nuwe rigting in te slaan? Te waag?

Soms is die oplossing maklik: Die uitleef van jou talente en gesonde verstand hoef darem ook nie teenoor mekaar te staan nie. Dalk moet jy iewers net klein begin en jou drome stadig begin uitleef. Dan hou jy jou werk en word deeltyds 'n kunstenaar.

Soms is dit nie so maklik nie. Jy word dalk gedwing om meer radikaal te kies.

En hier werk iets verborge, want dan moet jy soms teen jou beterwete in besluite neem. Want jy weet diep in jou hart: As jy net van jou verstand leef en nie ook met jou hart nie, is dit nie meer gesond nie. Wat baat dit ‘n mens wat met ‘n onvervulde hart leef? As iets aan jou bly knaag en jy werk nie daarmee nie.

Hoe hoor ‘n mens God se wil vir jou lewe? Dikwels, baie dikwels, met jou hart.


Dan moet jy waag. Want as jy in jou hart weet dit is wat God van jou vra en jy kan biddend in God se teenwoordigheid aanvoel dit is die pad wat jy van nou af moet loop, sal God by jou wees. Al dink baie mense jy is van jou verstand af....