Die Son skyn....

Vandag, selfs in hierdie koue winter-tyd, skyn die son soos op 'n vrolike lentedag - en dit na twee baie koue en reenerige dae.  

Opvallend hoe dit 'n mens se gemoed lig.

En toe vanaand lees ek hierdie eenvoudige opmerking van Wilhelm Loehe:"Laat ons ons trane afdroog en die lampe van rou uitdoof, want die Son van Christus is aan die skyn." 

'n Stil herinnering aan hoeveel blydskap daar in die geestelike reis te vind is - selfs al is dit wintertye waarin ons dikwels op reis is. 

Wat my laat dink aan die beroemde verhaal van die Emmaus-gangers met hul somber gesigte. En hoe die ontmoeting met die opgestane Christus hul harte warm gemaak het...  

Ons geestelike reis word dikwels deur onvreugde en gekla oorheers. 

En dit terwyl die Son helder skyn.