Vir
Bernard van Clairvaux is die mens eers op weg na God wanneer ‘n mens gestroop
word van alles wat so maklik en baie ‘n mens se lewe volmaak. Reiniging noem hy
dit: daardie proses van suiwering, wat die vullis, blokkasies en verstoppinge
uitkrap en wegneem.
Maar
ons kan oor hierdie reiniging op allerhande en mooi maniere praat. Hoe gebeur
dit?
Bernard
dink as voorbeelde aan twee dinge. ‘n Mens word gesuiwer van die alledaagse
liefhebberye waaraan ‘n mens so verknog kan raak. Woede is een daarvan. Nog een
is jaloesie.
‘n
Mens moet die belangrikheid hiervan nie mis kyk nie. Helder water loop nie deur
verstopte pype nie.
Maar
‘n mens se reis met God moet ook verder loop en met iets meer besig bly: dit
begin wanneer ‘n mens begin om dinge te omhels wat eenvoudig en mooi is:
Bernard noem nederigheid as ‘n voorbeeld. Maar daar is ook ander. ‘n Mens wat
oop is vir God is iemand wat ook soek na regverdigheid. So ‘n mens is sag,
vriendelik en toegeneë.
Deur
hierdie dinge te bedink en te doen, is ‘n mens besig om jou gedagtes op God te
rig. Jou aandag word afgetrek van die oppervlakkighede wat jou so besig kan hou
en so woedend kan maak en so jaloers kan laat word.
Het
ons ooit daaraan gedink dat gebed juis ook dít is: dat ‘n mens oop is vir God,
dat ‘n mens sag en met geneentheid opkyk na die liefde wat wag om uitgenooi te
word en in jou bestaan in te kom? Biddend vra ons dat ons van ons ou bestaan
gereinig word om in ‘n nuwe manier van leef ingetrek te word. Die biddende
verlange is ‘n innige afwagting op die liefde.
Terwyl
ek dit bedink, tref dit my hoe dikwels die Bybel oor sagtheid praat. Dit is
deel van ‘n hele rits van kenmerke wat ‘n gelowige het.
Kolossense 3:
Maar nou moet julle ook dit alles aflê, naamlik toorn, woede, boosheid,
laster, skandelike taal uit julle mond…
Beklee julle dan, as uitverkorenes van God, heiliges en geliefdes, met
innerlike ontferming, goedertierenheid, nederigheid, sagmoedigheid,
lankmoedigheid. (Sien ook Filippense 4:2 en 5.)
Maar
ek is geboeid deur die feit dat Jesus self ‘n aangrypende uitnodiging aan sy
volgelinge rig in terme van sagmoedigheid en nederigheid: "Kom
na My toe, almal wat vermoeid en belas is, en Ek sal julle rus gee. Neem my juk
op julle en leer van My, want Ek is sagmoedig en nederig van hart, en julle sal
rus vind vir julle siele: want my juk is sag en my las is lig” (Matteus
11:28-30).
By
Hom, die nederige en die sagmoedige, kom die verlangende mens tot rus.
