Die opwinding omdat God mense nie opgee wanneer hulle ontrou
aan God raak nie, word soveel sterker as ‘n mens begin nadink hoedat God sulke
mense weer naderbring na God toe.
Herskepping, noem ‘n mens dit: God wat die mens geskep het en
toegesien het hoe die mens ontrou raak, skep nuwe moontlikhede vir die mens.
Die mens kan weer tot die paradys terugkeer. God bring die
mens weer terug. Dit gebeur wanneer God die mens herschep.
Tog is die herskepping meer spesiaal en anders as die skepping.
Die herskepping is spesiaal omdat dit nie maar ‘n
gebeurtenis is waardeur die mens word wat hy of sy altyd was nie. Iets intenser
gebeur: God herskep die mens beter as ooit tevore. Dit is asof God die eerste
skepping oortref wanneer God mense uit hul ontrouheid gaan haal.
Juis daarom is die transformasie in herskepping so opwindend.
Verstom kyk mense toe hoedat hul, ten spyte van ontrouheid, meer word as wat
hulle ooit was en nader aan God kom as wat hulle ooit tevore ervaar het.
God herstel nie maar net die mens se situasie wat dit was
voordat die mens die verhouding met God vernietig of verwaarloos het nie.
Dit is asof die liefdesverhouding met God tot nuwe hoogtes
gevoer word.
Dit is asof die oorwinning oor die kwaad, die afskeid van die
ontrouheid, ‘n ruimte skep waarin die mens op ‘n spesiale manier nuut gemaak
kan word.
Wanneer mense ‘n nuwe verhouding met God ervaar, is daar
altyd die gevoel dat hierdie tweede kans onverdiend gekom het. Steeds weer sê
mense dit is pure genade dat hulle tot dieper insig gekom het, dat hulle ‘n
ommekeer gemaak het en dat hulle ‘n spesiale liefdesband met God ervaar.
Dit is nie iets waartoe mense uit hulself kom nie. Of iets
wat die mens doen nie.
Hulle bely in verwondering: dit is ‘n gawe van God. Om te kan
terugkom na die Vader, is nie net ‘n terugkeer nie. Dit is ‘n aankoms in
oorvloed, in onvoorstelbare goedheid.
En wie genade ontvang het, leef intenser, mooier en in
intiemer as ooit tevore. Nadat die kwaad en die vernietiging uit die mens se
lewe gesny is, is daar iets spesiaals aan wie die mens is.
God herskep so dat die mens asemrowend lyk. Die ou paradys is
nie bloot herstel nie. Nou is dit ‘n nuwe hemel, ‘n nuwe aarde, wat duisend
keer mooier is as die eerste paradys.
