Kalmte
is een van die geestelike gawes wat ‘n mens die meeste ontbeer: Die lewensgang
van mense is krampagtig, gejaagd, onrustig, gespanne en taai. Kalmte is nie
juis ‘n uitstaande kenmerk van ons tyd nie.
En
tog: Kalmte is ‘n seëning wat mens die meeste begeer.
Maar
wat is kalmte?
Sekerlik
beteken dit dat ‘n mens nie gespanne is nie. Dit beteken dat ‘n mens vrede in
jou gemoed het.
Maar
dit beteken ook dat jy dinge laat gaan.
Laat
dit gaan. Los dit. Laat maar.
Die
Engelse het “detachment” as ‘n goeie ekwivalent: om nie
afhanklik te wees van ander mense en dinge nie. Jy word nie deur hulle opgewerk
nie. En jy laat ook nie toe dat mense jou vies maak nie omdat jy nie vir hulle ‘n
houvas op jou lewe wil gee nie. As jy dit doen, word jy afhanklik van hulle
mening en dade. Jy kan afstand neem en hou.
‘n
Mens sou kalmte dus kon beskryf as oorgawe, as onversteurdheid. Jy aanvaar die
dinge wat nie verander kan word nie. Of beter gestel: jy berus in God se wil.
Die
teendeel hiervan is om jou wil te wil afdwing. As dinge nie na jou sin loop
nie, raak jy opgewerk, stribbel jy teen.
Daarom
kom kalmte na mense wat bereid is om hulle self te verloën.
Jy
weet: jy het jou deel gedoen. Jy werk en jy woel, maar God is dit wat
uiteindelik ook werk en wil.
Wanneer
‘n mens die geestelike praktyk van kalmte najaag, is ‘n mens terselfdertyd
besig om verder op die geestelike reis te vorder. Op hierdie reis is daar ‘n
klomp bagasie wat jy langs die pad moet los.
As
jy dit saamsleep, val jy vas.
Natuurlik,
vanselfsprekend is die kwaad en die sonde dinge wat ‘n mens moet aflaai. Maar
uiteindelik gaan ‘n mens nie kalmte vind as jy jou eie dinge najaag of jou eie
koers wil bepaal nie.
Die
geestelike reisiger weet: die reis neem ‘n mens na God toe.
Paulus
het hieroor in Filippense 3:14 gepraat: “ek vergeet die dinge wat agter is en
strek my uit na wat voor is, en jaag na die doel om die prys te verkry van die
hoë roeping van God in Christus Jesus.”
Kalm
kan hy, daar in Filippi se tronk, al skrywende aan sy liefdesbrief, sy rug
draai op wat verby is. En vashou aan die verskyning by God.
Kalmte
kom na hulle wat biddende verlang na ‘n lewe met God.
