Die persoon wat mens na buite uitstraal
is eintlike net 'n masker.
Daardie "persoon" is nie die
"eintlike" mens nie, die een wat 'n mens werklik is nie.
Die eintlike mens lyk heel anders as
die een wat mense van buite raaksien.
Die persoon agter die masker leef op die
vlak waar vooroordele, emosies, afkere, onverskilligheid,
afguns, venyn en selfsug hoogty vier.
Mense is soms nie eers self bewus van
die onbekende "ek" met al sy skerp kante, wat agter die masker
verberg is of weggesteek word nie.
Somtyds kom die masker af. Ander mense
ontdek agter die masker 'n ander persoon met 'n donker kant.
Hierdie donker kant maak dat 'n mens se
geestelike lewe dikwels arm en honger is. 'n Mens leef uit voeling met jou
werklike en innerlike ek wat op vele maniere geestelike verlangens en behoeftes
het.
Soms word 'n mens se donker kant na
buite bekend. Wanneer 'n mens iets fouts doen of verkeerd optree, kan ander
bewus word van 'n lewe wat hulle nooit andersins met iemand sou assosieer nie.
Dit is en bly 'n groot uitdaging wat 'n
mens met hierdie donker kante van jou bestaan moet doen.
Een van die mees konstruktiewe maniere
is om deur geestelike oefeninge daarmee in die reine te kom. Geestelike
oefeninge soos gebed, vas, gasvryheid, afsondering, geestelike bevriending,
geestelike gesprekke en vele ander, kan almal 'n bydrae lewer tot 'n mens se
geestelike genesing en groei. Deur hierdie oefeninge ontdek 'n mens watter
kragte in 'n mens se lewe aan die werk is. 'n Mens word gekonfronteer met
verborge begeertes en gedrewenheid. Iemand kon ook in die konteks van 'n
geestelike verhouding bewus raak van sake wat 'n mens se geestelike lewe en
groei belemmer.
Dit is juis die doel van geestelike
oefeninge: die oefeninge is meer as net om 'n mens geestelike lewe bloot aan
die gang te hou nie. Dit wil dieper sny en 'n mens laat losbreek van alles wat
in die pad staan van die ideaal van 'n dieperwordende verhouding met God.
Trouens, wanneer 'n mens nadink oor wat
'n geestelike oefening is, is een van die maatstawwe daarvoor juis hoe hulle 'n
mens kan help om die innerlike, verborge mense in die helder lig van God se
reinigende werking te plaas.
