Die mistieke liefde inspireer en transformeer

Die hart van die mistiek is die liefde. ‘n Mistikus is iemand wat deel kry aan die opwindende liefdesverhouding van God met die mensdom. ‘n Mens staan in verwondering voor God wat liefde aan jou skenk en wat jou in staat stel om lief te hê. Watter voorreg om te voel jy word bemin en met watter verbasing kom ‘n mens agter hoe jy deur liefde self teenoor ander kan leef.

Dit klink alles goed. Maar om van die liefde te weet is nog nie om uit die liefde te leef nie. ‘n Mens moet jou oorgee aan God se oorweldigende liefde, want dit is waaroor die lewe werklik gaan. Ons bestaan is te danke aan die goddelike liefde. Ek moet my hart instort in God se liefde, dit oopstel dat hierdie liefde volledig in my kan kom woon. Ek moet my verlustig in wat God aan my gee.

As ek die liefde my eie maak, doen dit iets radikaals aan my. Dit is deur die goddelike liefde dat mense en gemeenskappe radikaal getransformeer word. As ‘n mens jou in God se liefde verloor, wanneer ‘n mens besef God in sy grootheid stort liefde oor jou uit, dan verbind dit jou op ‘n intieme manier met ander mense. Die groot mistici van alle tye was mense wat in liefde uitgereik het na ander. Andrew Murray wat ‘n lewe van eenheid met God gesoek het, was terselfdertyd iemand wat op Wellington belangrike onderwys-kolleges opgerig het en wat sterk betrokke was by die verkondiging van die evangelie. Andrew Murray was nie net iemand wat iewers in ‘n kamertjie mistieke boeke gesit en skryf het nie. Wat in sy binnekamer gebeur het, het sy omgewing drasties verander.

Ons kan nie God se liefde opsluit in ons hart nie, in ons kerke, in ons binnekamer of in ons gedigte of liedere nie. God se liefde neem ons saam in die wêreld in.

‘n Mistikus staan verwonder oor die krag van God se liefde in sy of haar lewe. In my, met al my beperktheid, my gebreke en my eenvoudigheid, wil God innige liefdesgemeenskap hou. En God wil my insluit in die groot liefdesgemeenskap wat God onder alle mense en in hierdie wêreld wil oprig. Die mistiek maak van my nie ‘n selfsugtige, hooghartige mense wat liefde in my opsluit nie. Dit maak my ‘n mens van liefde wat deel word van ‘n omvattende liefdesbeweging.

Daarom kan ‘n mens elke dag net iewers verbaas bly staan: om te dink, om te dink dat God mý lief het, óns lief het en dat hierdie mense rondom my aan my gebind is deur God se eindelose liefde!